طريقة الفعاله دي إسمها Spaced Repetition Learning.
دي طريقة لتعلم أي حاجة، مش اللغات بس، ولو كنت أعرفها أيام الجامعه أو المدرسة كان زماني فلحت بدون أي مجهود.
الفكرة كلها إنك لما بتسمع 100 معلومة مثلا، عمرك ما هتفتكر ال100 كلهم بعدها.
بيثبت في دماغك عشرة، عشرين أو تلاتين في المية بالكتير من اللي انت سمعته، والباقي بيطير.
فهنقول مجازا يعني (لأن ده علميا مش دقيق قوي) إن فيه حاجات بتثبت في الذاكرة طويلة المدى عندك، وحاجات بتثبت في الذاكرة قصيرة المدى.
والذاكرة قصيرة المدى دي، أنت ممكن تدفس فيها معلومات كتير، زي ما بنعمل قبل الإمتحانات كده، لكن للأسف بعد فتره قصيرة المعلومات دي بتتبخر..إنما اللي دخل الذاكرة طويلة المدى مابتنساهوش بسهولة وبيفضل معاك سنين.
فالهدف، إن بطريقة ما تنقل المعلومات اللي انت عايز تفتكرها، من الذاكرة قصيرة المدى للذاكرة طويلة المدى.
التكرار هو أحسن طريقة لده..إنك تقعد تقرا احاجة مرة وأتنين وتلاته…لكن المشكلة إن ده بيضيع وقت كبير قوي، إنك تفضل تقرا حاجات أنت عارفها خوفا من إنك تنساها، بدل ما تستفيد بالوقت ده في تعلم معلومات جديده.
في نفس الوقت تعلم المعلومات الجديده لو ركزت عليه لوحده، ممكن تبدتدي تفقد من اللي أنت إتعلمته.
فأنت محتاج طريقة ماتبقاش بتستهلك وقت طويل وممله زي إنك تحفظ وبعدين تراجع بشكل مستمر كل اللي حفظته بشكل دوري.
وهنا ييجي دور الspaced repetition أو التكرار المتباعد.
تعالى نرجع للـ100 معلومة اللي انت عايز تتعلمهم. وتعالى نعتبرهم 100 كلمة في اللغة اللي انت بتحاول تتعلمها.
فأنت ممكن تجيب 100 كارت، تكتب على وش الكارت الكلمة وعلى ضهره معناها بلغتك. ودي طريقة فيه ناس كتير بتذاكر بيها.
أنت لو قريت ال100 كلمة دول وسيبتهم كام يوم ورجعت، هتلاقي نفسك فاكر لك عشره عشرين كلمة ونسيت الباقي.
اللي انت افتكرتهم دول، دخلوا في ذاكرتك طويلة المدى وقدرت تسترجعهم بعد كذا يوم، لكن الباقي مادخلش.
فأحسن حاجه، تركز على ال80 اللي فاضلين..تقراهم وترجع لهم بعد كام يوم..فاكر منهم حاجه؟
هتلاقيك فاكر لك 10% أو 20%، ومتبقي لك مثلا 68 كلمه..فتقراهم تاني وترجع بعد كام يوم، وهكذا.
فدي بإختصار فكرة التكرار المتباعد، إنك تركز على المعلومات اللي مادخلتش ذاكرتك طويلة المدى، فتوفر وقت ومجهود، ومن غير حفظ ولا تسميع ولا “مذاكرة” تلاقي نفسك عرفت كل المعلومات وفاكرهم ومش هتنساهم.
طرق تنفيذ التكرار المتباعد
الطريقة الأولى
إسمها The Goldlist Method ودي تقدر تعتبرها الطريقة اليدوي اللي فيه ناس كتير ممكن تفضلها.
وهي بتعتمد على اإنك تعمل يوميا لستة من 20 كلمة (أو 25..أو 30)
اللسته جي تكتبها (مش تحفظها أو تصمها..مجرد كتابة في ورقة) وماتبصش عليها تاني غير بعد أسبوعين.
بعد إسبوعين لما ترجع للسته دي تاني، هتلاقي نفسك فاكر شوية كلمات (تقيربا 30%) وناسي الباقي..فتاخد الباقي ده وتعمل بيها لسته تانية أصغر وتسيبها إسبوعين هي كمان.
وتفضل كل يوم ترجع للسته اللي انت كتبتها من إسبوعين، وتصفيها لواحده أصغر، لغاية ما يبقى عندك في كل لسته فاضل خمس أو ست كلمات. تاخدهم في صفحة جديدة خالص وتكون منهم لستة طويلة تاني من 20 أو 25 كلمة وتبتدي معاهم من أول وجديد، وهكذا.
ودي طريقة كل اللي بيعملوها بيحلفوا بيها.
الطريقة الثانية
الطريقة التكنلوجيه لده، ودي عن طريق برامج زي Anki وفيه غيره كتير فيه حاجه إسمها Quizlet وحاجه إسمها Memorion وغيرهم، بس أنا ماستعملتش غير Anki.
دي بقى برامج بتمكنك تعمل الكروت بتاعتك اللي انت عايزها بشكل إليكتروني، وتظهرها لك يوميا بعدد معين انت بتحدده.
وعلى حسب أنت بتفتكر الكارت بسهوله أو بصعوبه، بيبدأ يكررهولك بشكل متباعد أو متقارب.
يعني الكارت اللي بتفتكره بسهوله ممكن يطلعهولك تاني بعد إسبوع، ولو إفتكرته لسه بسهوله يبقى المرة اللي بعدها ممكن تبقى بعد إسبوعين، وبعدين شهر وبعدين شهور.
ولو إفتكرته بصعوبة، هيطلعهولك بعد يومين، ولو لسه مش فاكره، بعد يوم أو كذا مره في القاعده الواحده، لغاية ما تبدأ تفتكره.
نصيحة لو هتستخدم Anki.. عدد الكلمات اللي هتبدأ بيه يستحسن مايبقاش كبير لأنه هيفضل يزيد، فمتبالغش في عدد الكلمات وانت بتبدأ لغة جديده، لأن كل يوم هيبقى عندك الكلام الجديد، زائد مراجعات الكلام القديم، فكل شوية عدد الكلمات بيتراكم، ولو زودت قوي الكلمات الجديده مش هتلحق تستوعب، والبرنامج هيكرر لك كلمات كتيرة جدا لأنك مش فاكرها، وهتبتدي تتضايق لأنك بتقعد عليه وقت طويل وحاسس إنك مش فاكر معظم الكلام.
أحسن حاجه تبتدي بعشر كلمات في اليوم، وبعد شهر لو لاقيت نفسك صامد، زود…وحاول تظبط العدد بحيث إن الموضوع ماياخدش منك أكتر من نص ساعة في اليوم عشان ماتزهقش.
بس حلاوة وجمال Anki ده هو إنك لو مش عايز تعمل كروتك بنفسك، فيه community كبير عامل شير لكروت معموله جاهزة..فتدخل تعمل سيرش على Spanish مثلا، فهتلاقي حد عامل أهم 1000 كلمة وأهم 5000 كلمة، وأهم 500 جملة، والكروت معمولة بحرفية وكل كلمة معاها صوره بتشرحها ومعاها نطقها بالصوت!
وده مش موجود للغات بس، ده موجود لحاجات كتير قوي..هتلاقي مناهج طب جاهزه، هتلاقي كروت للي داخلين إمتحانات SAT وللي عايز يتعلم programming ولتقريبا أي حاجه تحب تتعلمها!
فهو إختراع رهيب Anki ده..نصيحة بس هاته على الكمبيوتر مش التليفون، لأنه على التليفون بفلوس ومش متاح من نفس الشركة أعتقد..لكن بتاع الكمبيوتر هو البرنامج الكويس المضبوط اللي فيه اوبشنز تريحك وتعرف تتعلم معاها.
بالنسبة للتكرار المتباعد نفسه بقى، أنا أشهد له وأبصم له بالعشرة وأنا شخص مابيعرفش يحقظ بتاتا، إنه طريقة فعاله جدا جدا جدا.
أنا بدأته عشان ناس كتير شهدت للطريقة، بالرغم إني كنت مقتنع إنها مش هتنفع معايا وإني هنسى الكلام وولا هستفيد حاجه، لكن أعتقد إنه بقى أهم tool عندي في ترسانة تعلم اللغة، أو يمكن تعلم أي حاجة على الإطلاق.
لو بتتعلم لغة، الطريقة دي بتكبر لك الvocabulary أسرع من أي حاجه تانيه، وده بيخليك تفهم كلام أكتر في وقت قليل، ويخليك تعرف تبتدي تتفرج وتسمع حاجات باللغه دي من بدري ودي حاجه مهمه جدا.
اللي عايز يفهم أكتر فيه فيديوهات كتير على يوتيوب عن الGoldlist Method وعن إزاي تتعامل مع Anki وعن الSpaced repetition نفسه.
